العالمي : بشاير البريكس وصلت.. إيه اللي حصل

طيب مصر هتستفاد ايه من الانضمام لمجموعة البريكس؟.
انضمام مصر لمجموعة البريكس هيكون لها فايدة كبيرة جدا خصوصا انه ممكن مصر تتبادل مع الدول الأعضاء في المجموعة بالعملات المحلية، وده هيكون حل بديل وقوي للقضاء علي سيطرة الدولار في عمليات الاستيراد خصوصا ان المجموعة دي بتضم عدد كبير من الدول اللي لينا علاقات تجارية بارقام دولارية كبيرة زي الصين اللي بتستورد منها عدد كبير من الورادات المصرية وطبعا كلها بالدولار.
مصر كمان ممكن تستفاد من انضمامها للبريكس عن طريق روسيا واللي بتستورد منها نسبة كبيرة من القمح اللي بتستخدمه مصر لتصنيع رغيف العيش للمواطنين خصوصا ان مصر  من اكبر الدول في العالم استيرادا للقمح وطبعا القمح ده حاجة من الاساسيات اللي مصر متقدرش تتاخر فيها خصوصا أنها بتمس قوت الشعب المصري كله.
مصر كمان تقدر من خلال عضويتها في مجموعة البريكس تستفاد من الدعم اللي بتقدمه المجموعة للدول الاعضاء خصوصا أنه في اتفاقية في المجموعة أسمها الاحتياطي الطارئ واللي بتنص علي أنه في حالة وجود اي دولة من اعضاء المجموعة وعندها مشكلة أو نقص في الاحتياطي الدولاري، فلها الحق في طلب الدعم من دول البريكس مقابل العملة المحلية.

كمان مجموعة البريكس مجموع عندها اتفاقية لمعالجة عجز الموازنة، والاتفاقية دي بتتيح للدول الأعضاء اللي عندها عجز مالي طلب الدعم من بقية دول المجموعة للمساهمة في تغطية جزء من العجز ده. 
مصر حاليا بتحاول تستفاد من عضويتها في مجموعة البريكس وبتحاول أنها تجذب مستثمرين من الدول الاعضاء في المجموعة علشان كده مصر وقعت عقود لانشاء مصانع لمستثمرين من تركيا والصين والإمارات واغلب الاستثمارات اللي بتدخل مصر حاليا من الدول الاعضاء في المجموعة .